نقدر ننجز أشياء كثير كثير بشكل مذهل بحياتنا دام ربي بفضله منحنا فرصة الحياة وترك قدامنا كل الخيارات مفتوحة.. هالشغلة رسخت في بالي بعد ما قضيت كم ساعة زيارة في المستشفى، بين خالتي الكبيرة بالسن لها كم سنة على سريرها -الله يشافيها ويلطف بحالها- وبين طفل صغير رضيع ولد صديق أخوي بعد ماطلعنا من خالتي رحنا نزوره

فتح المصعد ع الدور السادس قسم الأطفال، كل الجدران الستاير واللوحات الوان منعشة مرره، العاب، صور، الجو مهيئ بشكل متقن لإبهاج الأطفال، لكنك ماتسمع صوت ضحكة وحده لطفل، كل هالأشياء ماقدرت تمنحهم ضحكة صادقة بدون تعب وألم،جوها جدرانها ستايرها ألعابها كلها تقول حاولنا كثيير بس ما قدرنا نسويلهم شي ما قدرنا نمنحهم الفرح، مشينا لين وصلنا قسم العناية المركزة، على اني تعودت كثير أدخل هالقسم لأمي وأبوي وعمتي وخالتي الله يرحمهم جميع بس هالمره غير أول مره أدخلها بقسم الأطفال،

غرفة 607 الطفل سعود له في الحياة سنة ونص يعني في سن قمة تعلق أهله فيه، غرق بالماي وأمه تحممه في البيت شئ ما توقعوه لكنها الأقدار، دخل غيبوبة عايش حالياً ع الأجهزة جلسنا نقرا عليه شوي وندعيله، عورني قلبي طلعت منه رحت للغرفة اللي بجمبه،ع السرير طفلة صغييرة بعمر الـ4شهور حسيتها عطتني صفعة قوية.. ما أدري من أيش تعاني بالضبط، بس شافتني صارت تتعبببر عيونها أحسها تحكي كثيير بس ما أسمع لها أي صوت أشوفها تصيييح بحرقة لكن ما أسمع ولا حس أبد، كان فيه أنبوب تنفس مركب في حلقها يمنع صوتها من الوصول لي وللحياة حولها في المقابل يمنحها هواء بسيط يساعدها بالتنفس، كانت تمسك أصبعي وتقبض عليه بكل ماتقدر بيدها الصغيرة الضعيفة وتحاول تمصه بلهفه، تعبانة جيعانة ومو قادرة حتى توصل صوت دموعها لي ولا لغيري، وقفت عندها قلبي تعلق فيها كثير وأنا احسها تستجديني بعيونها بدون صوت

طلعنا من المستشفى وأنا أفكر أنا ويني الحين! أنا بالضبط بين المرحلتين بين خالتي الكبيرة وبين هالطفلة الصغيرة كلنا منحنا الحياة لكن الفرق أني أقدر وهم لاحول لهم ولا قوة، أقدر أقدم خطوة قدام بجسمي وبعقلي وبفكري وبإنجازي عندي طاقات امكانيات قدرات كثير منحني اياها مع الحياة ليه انتظر لين تتعطل وما اقدر استفيد منها، أختارني من بين آلاف غيري سليمة معافاة ليه أعطل أشياء كثير أملكها ممكن تكون سبب في تطوير وتغير وإفادة ذاتي وغيري

.

x خلونا نفكر ايش ممكن تتمنى خالتي الحين ولا تقدر؟

x ايش ممكن يسوي هالطفل لو كبر شوي وصار شاب بعمري لكن قدراته محدوده مو قادر يستفيد منها بشكل كامل؟

* هالاجابات بتساعدنا كثير انو ايش ممكن نسوي أحنا ؟؟

x

شكراً كبييرة كبيرة بحجم سعادتي لأوتار ويمامة اللي لعوزتهم لين خلوني أطلع بطلة جديدة وستايل يناسبني

هذه التدوينة ادرجت بتاريخ 15 أغسطس 2009 في الساعة 9:23 م ضمن تصنيف من القلب. يمكنك متابعة أي تعليق من خلال RSS 2.0 خلاصات التعليقات. يمكنك ترك تعليق, أو تعقيب من خلال موقعك الشخصي.