دمتم سالمين
ما أدري بالضبط هل أقول أنه من حسن أو من سوء الحظ أنو مدرستنا أختيرت من قبل الوزارة كمدرسة -معززة للصحة- لتطبيق هذا المشروع، هي الفكرة مره حلوة، حلوة ومهمه بشكل كبير بعد مو بس حلوة، لكن لما أفكر أن المشروع كبير كثير وبيستمر 3 سنوات متواصلة يعني معناها أكيد نحتاج نبذا فيه جهود كبيرة وجبارة عشان نوصل للهدف المنشود،
بعد اجتماعات مستمرة واستبانات للأهالي والبنات أخترنا أنو يكون تعزيزنا للصحة يتمثل في التثقيف بالتغذية الصحية، هو ممكن نختار أي فكرة ثانية تخدم الصحة سواء نظافة أو رياضة أو غيره، لكن حسينا أن أتفاق الآراء أغلبها أجمع على التغذية الصحية لحاجتنا الماسه لها، خاصه أن البنات مره تغذيتهم كثير سيئة ما يعترفون بشي أسمه فطور أساساً والفسحة شبس تشوكليت عصير وخرابيط، وبالبيت الغدا والعشا : ألو ماك ألو كنتاكي، وشوف البشرة كيف عاد! واضح عليها تعبانه والتركيز اي كلام عشان كذا صار تفعيل هالموضوع مهم بالنسبه لنا
شعار المشروع اللي اخترناه -دمتم سالمين- واللي صرنا علطول نردده أنا وفطوم 
الأسبوع الماضي افتتحنا مشروعنا بمسرحية مره كانت رائعة وصلت الفكرة من خلالها بشكل جداً طريف وكوميدي، تمنيت اني صورت لقطات منها بس نسيت كاميرتي :/
الآن حنا قاعدين نمشي بالخطوة الثانية وهي: ثلاث أسابيع كلها تدور حول فوائد التمر واللبن، وبعدين 3 أسابيع للفواكة، و3 أسابيع للخضروات، نبي كل البنت ما تخلص من كل 3 أسابيع إلا وهي متشبعة بالمعلومات ومقتنعة فيها وحارصه على تغذية نفسها بنفسها وتوعي اللي حولها فيها، الأفكار المطروحة كثير ولا زلنا في مرحلة العصف الذهني في كل شي في المسابقات والنشرات والفعاليات والمسرحيات والحفلات في كلشي كلشي قاعدين نفكر فيه،
طرا في بالي الحين ناخذ البنات في رحلة لمصنع التمور
مره كنت أحب هالفقرة في أفتح ياسمسم لما ياخذون الصغار للمصانع ويتفرجون على صنع الكاكاو والورق وغيره 
اممم اتوقع الفكرة مو سهله كثير لأن ما أخبر فيه مصنع تمور قريب في منطقتنا بس بحطه في بالي وأشوف موضوعه 
طيب فكرت بعد في آخر يوم في 3 اسابيع التمر نوقف سيارة ددسن قدام المدرسة وخلي واحد يتبرع ويوزع على الأهالي والسواقين اللي جايين ياخذون بناتهم أكياس تمر بشكل مرتب وحلو ومعها بروشور بالفوائد ومعلقين طبعاً الشعار فوق السيارة وراسمين عليها إذا أمكن وكذا قلت لهم الفكرة وضحكوا عليها 
أنا عاجبتني أحس بتصير أكشن، ما علي منهم مهمتي الحين بدور حد يتبرع لي بددسن وانا ما حصل حد يوزع ببسط فيها أنا
طيب بعد نبي أفكار خنفشارية كثيرللفعاليات والمسابقات وكلشي للأكلات الصحية المبتكره مع طرق عرض جديدة..
التدوينة هذي مهمه بالنسبة لي كثير ومرره محتاجة أفكاركم وآرائكم وانتظرها أي شي يجي في بالكم لا تبخلون فيه الله يسلمكم وأكون شاكرة لكم جداً 
ودمتم سالمين
هلا جوهرة :*
اما بالفصول او بالقاعة الكبيرة .. حلو بالفصول يصير تنافس مين افضل فصل ..
كنا بمدرستنا بين كل فترة وفترة نسوي يوم (طبق خيري) كل فصل اي طالبة تجيب من بيتها أكلة وووقت النشاط نبيع
والربح يصرف الى الجمعية الخيرية و الأسر الفقيرة..
فكرت لو نهاية كل ٣ اسابيع تسوون يوم كذا ويكون مقتصر على نوع الغذاء اللي تتكلمون عنه هالوقت، مثلا اسابيع الخضار راح يكون يوم الخضار يعني كل الاكلات والاطباق تحتوي على الخضار كعنصر اساسي في الطبخة ..
بالتوفيق
صبا
اهليين
حلو هذا اللي بيصير دايم بس ودنا بشي مبكر غير تقليدي
يعني الفكرة تمام بس آلية التنفيذ يبيلها طرح جديد وكذا..
شكراً عزيزتي
يييييييء لااا
مدرستنا معززة للصحة بشكل مقرف
غصب غصب نشرب حليب
غصب غصب نشرب لبن
غصب غصب ناكل تمر
ما عندهم فن الاقناع او حتى انهم حسسونا باهميته
انصحك تصري على افكارك البنات حيحبوها مره
واذا ما مشي الحال ودوهم مصنع معمول تمر حق حلوان اخوان
قد رحناه واكلونا منه وهو حااااار طالع من الافران
أروى
ممتاااز انج جيتي ورديتي أنا أبي ناس كذا مجربين
طيب قولي لي أفكار تمنيتي أنهم سووها لكم مثل ايش؟
ايش تحسين أنه ممكن كان يوصلكم للقناعة بدون ما يغصبونكم عليه طبعاً؟
أنتظرج
حبيت المشروع جدا،، فكرة رائعة و ممكن فعلا تغيرون أسلوب حياة البنات و توعونهم.. بس فيه نقطة حسيت إنكم غفلتوا عنها..
قبل ما تبدؤون تبينون للبنات فوائد الطعام الصحي.. أحس محتاجين تنبهونهم لمضار العادات السيئة.. مثل تجاهل الفطور و الإكثار من الفاست فود، لأن الأكثرية ياكلون من هالخرابيط و هم أصلا مو منتبهين لمقدار الضرر الي تسببه..
تعرفين شو ودي؟؟
إنكم تبدؤون بأول ثلاث أسابيع في إظهار كلللل السلبيات و المخاطر و الأمراض من كل النواحي، سواء من ناحية الجمال و الرشاقة و التركيز و الانتباه و الذاكرة و الصحة بشكل عام.. بحيث إنه يلامس كل فتاة في جانب اهتمامها… لحد ما البنات يقتنعون بشكل كااامل إنهم خلاص، ما يبون ياكلون من هذا الأكل.. و هم بنفسهم راح يسألون عن الحلول و البدائل..
ساعتها بس تبدؤون في الطعام الصحي و فوائده و ياريت تخصصون في كل ٣ أسابيع أسبوع لإعداد الأكل الصحي.. طبعا اعتمادا على الصنف الي تتكلمون عنه، يعني تعطونهم حلول عملية و سريعة، مثلا التمر و اللبن.. تعلمونهم طرق سريعة و سهلة لتحضير أصناف باستخدام التمر.. لأنه مو كل حد يحب ياكل التمر..
الخضار.. أصناف سريعة للسلطات و الشوربات و وجبات سريعة للعشا مثلا..
الفواكه.. أصناف حلويات أو وجبات سريعة و سهلة ممكن إعدادها كسناك بوقت العصر مثلا
أحس هالخطوة مهمة جدا بقدر أهمية إظهار الفوائد.. لأنه الكلام النظري ممكن يقنعهم يوم يومين.. لكن لما إيون للتطبيق و يحسون إنه شي ممل راح يتركونه بسرعة و يهملونه.. يعني كل حد يقول كلوا خضروات و فواكه.. طيب شلون ناكلها؟؟ كل يوم كل يوم بنفس الطريقة؟؟ أنا نفسي أمل من هالشي!! فما بالج ببنات المدارس؟
ممكن تستعينون بكتب الوصفات الصحية أو برامج الطبخ الأجنبية.. فيها وصفات عملية و سريعة..
أدري كثرت كلام،، بس تحمست معاكم P :
إن شاء الله إذا لقيت البرنامج الي قلت لج عنه على قناة الجزيرة الوثائقية راح أرجع..
و إذا خطر ببالي أي فكرة ثانية بتلاقيني مسنترة هني D :
فراوله طبيعيه مع شوكولا سائله تنباع عالبنات يغمسونها وياكلونها
فواكة مجففه ممكن تنباع وفيه محلات أظن تسوي منها حلويات كمان
ممكن أرجع لك بافكار تانيه
موفقه
سلمى
الله يبارك في هالموضوع اللي جابج
توقعتج بتفيديني فيه
كلامج سليم حلو، حنا حطينا أهداف بس شكلنا ما مشينا بالطريقة الصحيحة في تطبيقها واللي ذكرتيها، صح المفروض نتكلم عن العادات السيئة في التغذية وبعدها هم من نفسهم بيصيرون يبون الحلول
غايتنا :
غرس المفاهيم الصحيحة للغذاء السليم وأثره على الجسم والعقل .
أهداف المشروع :
معرفة القيمة الغذائية للأطعمة الصحية .
الحرص على تناول الغذاء المتوازن الذي يحتوي على العناصر الغذائية .
معرفة الطريقة الصحيحة لحفظ الأطعمة .
تجنب الأطعمة التي تحوي ملونات صناعية أو مواد حافظة .
نشر ثقافة الطب النبوي والطب البديل
الاهتمام بالرياضة و أثرها على لياقة الجسم و صحته .
إشاعة روح التعاون و التنافس بين الطالبات
حلوة كثير فكرة البرنامج اللي قلتي .. انتظرج لو حصلتي شي وافكار جديدة
مررررره شكراً حبيبتي
عابره
افكار سريعة وحلوة
بانتظارج.. شكراً كثير
إي صح، تعرفين جميل القدسي؟
لو تدورين باليوتيوب أتوقع بتلاقين له مقاطع كثير.. يتكلم فيها عن الغذاء من ناحية علمية و يربطه بما ذكر في القرآن.. أمس و أنا بالسيارة سمعته يتكلم عن الزنجبيل و ذكرتج.. أتوقع بيفيدكم
البرنامج دورته في أرشيف الجزيرة و ما لقيته.. بحاول أبحث بطرق أخرى : )
سلمى
صح زين ذكرتيني فيه رايح من بالي.. ممكن يفيدنا كثير
شكراً كثييير حبيبتي
