أطفي المكيف وأشغلة أكثر من مره من صحيت ما أدري الجو متقلب ولا مزاجي..

خالتي نورة انتي اللي الدنيا بتفقدك جد.. بتفقد طيبتك، كرمك، كلامك، سوالفك، ضحكتك، لسانك اللي مايوقف عن ذكر الله من عرفته في كل وقت.. بتجتمعين الحين بأحبابك بأمي وأبوي وبخواتك فاطمة و وضحى ومحمد، قال لي أخوي أنو من لطيف أمر الله صار قبرك جمب قبر أمي

خالتي اللي مثلك ما أقدر أحزن عليه، صح افقده ويصير مكانه فارغ ما احد يمليه، بس أكون مطمئنه عليه، اللي مثلك يروح وهو يبي يروح يقابل ربه يروح وهو واثق ومطمئن للشي اللي رايح له، اللي عايش حياته كلها خير وكلها ذكر وكلها تذكير للي حوله، لسانه رطب علطول من ذكر الله وشوفته لحالها تذكرك بالله، تشرح صدرك تبسطك تخليك تبتسم براااحه وما ودك تقوم منه، اللي مثلك إيمانة عقيدة صادقة صافيه وتوحيد كامل مافيه شبه مافيه زلل مافيه زيغ مافيه اي تشويش.. انتوا اللي صدق فهمتوا ايش يعني التوحيد، انتوا اللي الحين لما يجي يومكم تفرحون فيه لانكم فاهمين فكرة أنكم عملتوا والحين بتتجازون، وواثقين من اعمالكم ونياتكم، بس اللي مثلي ايش بيتجازا عليه!!

خالتي..صح فقدنا تواصلنا معك من فترة طويلة وماعدتي تكلمين حد وانتي على سريرك بس تكفي مسكة يدك أحس فيها بكلشي تبين تقولينه، اليوم ياخالتي انتي مرتاحه من الدنيا وتعبها، اليوم بإذن الله بتقابلين حبايبك وبتتنعمين معهم..

يارب أغفر لخالتي وأمي أابوي وكل من فقدناه واجمعنا بهم في جناتك ياكريم ..

.

رداة فعل الناس تجاه الموت تختلف أنا عني شخصياً أحسها تقويني وتخلي رغبتي في اكمال قصة الحياة واللي تستاهلني وأستاهلها أكبر وأكثر..

اللي يخليني أدخل حالات صمت وقت سماع خبر وفاة أحد أكثر من فقده، يكون فكرة وأنا مته دوري؟ وايش بيكون شعوري؟ وايش بيجازيني عليه!

هذه التدوينة ادرجت بتاريخ 11 مارس 2010 في الساعة 5:49 م ضمن تصنيف اليوم وبكرة وبعده, من القلب. يمكنك متابعة أي تعليق من خلال RSS 2.0 خلاصات التعليقات. يمكنك ترك تعليق, أو تعقيب من خلال موقعك الشخصي.